Exo 8 | BJR | STEP | Yáaweefa kafáa Mooseesa Áaroonasa qímanniminoo qinau. Ínneeqara Fáraoo finnaí óonuree maaqí qímasee qímamiaqa. Yáaweefa aníara maaqí qídanoo. Anée qiní qíku qísauku idukúsainaqa misá qiníara innaaru qídaqa qimooqiaqée qinoo.

Exodus 8

Eeqamoosauqá kambíqaqau.

1 Yáaweefa kafáa Mooseesa Áaroonasa qímanniminoo qinau. Ínneeqara Fáraoo finnaí óonuree maaqí qímasee qímamiaqa. Yáaweefa aníara maaqí qídanoo. Anée qiní qíku qísauku idukúsainaqa misá qiníara innaaru qídaqa qimooqiaqée qinoo. 2 Anée qáòo qínaqa qinée eeqamoosa moómoora qíànaqa aniréeqa aní maqa máaqa qumbíqeefaranoo. 3 Niru nammáriki faqa eeqamoosa káì qumbiáqa márifaranoo miqóoqari anée kóoti maríanna firaa maaqánaki fáqa kéeqeefaranoo. Anée faiqée máriannanaki fáqa kéeqeefara. Aní qaarí qamunnasáa fáqa qumbiqéefaranoo. Aní faiqí firaasá fáqa aní máqannaasa fáqa misá óonidaki faqa afeekí fáqa qumbiqéefara. 4 Eeqamoosa fannóo ururéenoo aní fáqa aní aináinirausasaa rakísi máriasa fáqa aní máqannaasa faqa nifaaqaí akareefáranoo. Miqí qufanóo Fáraoofa sía mi ufána írinau.

5 Yáaweefa kafáa Mooseena qímaminau. Anée Áaroona maaqí qímasee qímamia. Dóo aneenná sáunù uqéeráseenana aiqáma nammári fáqa oorákinaa námmari fáqa áká mándira námmariuqa fáqa uqéera uqafíqasainanoo eeqamoosa fannóo moómoo ururéenoo Isipa máqa máaqa rafáaqa fúani.

6 Áaroonafa Mooseena ufa iriséenoo sáunù uqéeraseenoo aiqáma námmariuqa nimummaqa uqéeranau. Uqéerasoofanoo eeqamoosauqá moómoo nammárikiqari ururéeqa maqa máaqa rafáaqa fiqau. 7 Isipa máqannaa afuneé fásiqauqa misá faqa nárì afuneé áuqusoofanoo eeqamoosa moómoo nammárikiqari Isipa máqa máaqaki qumbiqáqau.

8 Fáraoofa eeqamoosara ákooqoofanoo Mooseena fáqa Áaroona fáqa náaramásee qímanníminau. Ínneeqara óonu Yáaweenara innaaru qímasaifanóo kafáa eeqamoosa niiqáani. Éeqamoosa aiqáma niiqámásainaqa qinee Isaraee máqannaa karabúsakinaana idukúsaanaqa óonureeqa Yáaweena aandáù tatúfirana suqá ámiaqa.

9 Mooseefa Fáraoona ufa iriséenoo qímaminau. Qinee ínniara innaaru qírara asasámmidaqa. Aneenná kai yáiree fee innaaru qíannee qínaqa qinée aníara faqa aní aináinirausasaa rakísirausara faqa aní máqannaara faqa innaaru qianáura. Mi faasaanná kai ínni máaqakiaqa qari eeqamoosauqa quqásee Niru námmariki kai óoqu márifarannoo.

10 Fáraoofa iriséenoo dúna kai innaaru qíànnee qufanoo Mooseefa iriséenoo qímaminau. Anée qíanandee íanáura. Miqíànana anee miná qáfamaseenana sía moó maqásaa anutufa Yáaweena maasá Ánutuna fooqáafa máridanoo fee qímasee írinnaranoo. 11 Aníki faqa aní aináiniranasaa rakísirausaki faqa aní máqannaasaki faqa mária eeqamoosáusa taiká fúannoo. Sía uqanna moodaa faqa káqi máriannoo. Niru nammáriki kai márifaránoo.

12 Mooseefa fáqa Áaroonafa faqa Fáraoona máaqakiqari ráudeeqa óonuroofanóo Mooseefa Yáawee funnái eeqamoosa Fáraoona faqa narí máqannaasaki faqa quqáqoona taiká nísaanifeera innaaru qinau. 13 Yáaweefa Mooseefa iroóndee inau. Aiqáma máaqakinaa eeqamoosauqa faqa máaqa naambeeqá qara máru eeqamoosáusa faqa máaqa saqama atiqara marusa faqa aiqáma qufaqá kuqu taikáqau. 14 Isipa máqannaasa mi eeqamoosáusa kúqiranauqa maréeqáida moodáanaki quqéesoofaqa putaa íqa aiqáma maqá máaqaki putaá úndi marínau. 15 Eeqamoosa kuqu taikáfufanóo Fáraoofa qáfamaseenoo Yáaweefa qundée inóo kaukaata qímaseenoo sía Mooseena faqa Áaroona faqa úfa írinau.

Aakúkauqa kambíqaqau.

16 Yáaweefa Mooseena qímaminoo qinau. Áaroona maaqí qímasee qímamia. Áaroona anée aneenná sáunù qumáree maqá rupéemma áminanoo kookooma fannoo qúandaki aakúkáikamafi Isipa máqa máaqaki umbiqáani. 17 Áaroonafa narí sáunù sámu kookooma rupéema ámufanoo aiqáma Isipa máqa máaqakinaa kóokoomma fánnoo aakúkáikinau. Mifa faiqí ánaasee faqa aandáuqa faqa nifaaqasása qumbiáqa márida ukaqá ními máriqau. 18 Isipa máqannaa afunee fásiqauqa Áaroona óosana qáfamaseeqa misá fáqa nárì afuneennái aakúka amanammásee qáfaanee qímasee amanufanoo sía ufaqa minnísaqau. Minnísoofaqa aakúkauqa aiqáma átinai amanaikíqa máriqau.

19 Afuneé fásiqauqa Fáraoona qímamiqa qiqau. Ánutufa maa ainainá áuqaidanoo. Fáraoofa misá ufa iriseénoo Ánutufa qundée ínoo kaukaata qímasee Mooseesa Áaroonasa ufa sía írinau.

Faufáariuqa kambíqaqau.

20 Yáaweefa Mooseena kafáa qímaminoo qinau. Dúna kanánaana uqanna Fáraoofa nammári áuqarara óoqu fúannoo. Anée kanánaana fíndifinana óoqureenana paqúrimasee maaqí qímasee qiní ufa qímamia. Fáraoo Yáaweefa aníara maa ufána qinoo. Anée qiní qíku qísauku idukúsainaqa qiní qimoo qiaqée qinoo. 21 Qinee aní aaqu qímáma qáidaqa anee sía idukínaqa qinee aní faqa aní aináiniranasáa rakísirausa faqa aní máqannaasa faqa faufáarinnóo aupúrarana nímianaura. Isipa máqannaasa máaqauqaki faufáari kai qumbíqaannoo. Aiqáma misá máqa maaqa faqa rafaaqa fuannoo.

22 Miqí máfinaqa qinee Kooseena máqa máaqaki qiní faiqí ánaasee máriasasaa ititásáana sía faufáari íannoo. Qinee miqíànana anee qiní Yáaweesara mi maqa maaqánaki máridanoo fee qinnáranoo. 23 Qinée aní faiqí ánaasee faqa qeeqá faiqí ánaasee fáqa raináanaura. Mi rainaráfa náaquqara áinaina dúna kambíqaannoo.

24 Kanánaana Yáaweefa qufaqá faufáari moómoo uqanna núkudara foorá aniréeqa Fáraoona ufa írira máaqaki faqa miná aináiniranasaa rakísi márusa máaqakiaqa faqa aiqáma Isipa máqa máaqaki faufáari fánnoo mandáika uqanna másanau.

25 Miqímmásoofanoo Fáraoofa Mooseesa Áaroonasa náaramáseenoo qímanniminau. Ínnee maaqóo Isipa máqa máaqaki moó átinai ínneeqa Ánutuna tatúfirana suqásee innaaru qiaqa.

26 Mooseefa narí qímaminoo qinau. Maasá sía amana miqíanaura. Isipa máqannaasa Yáaweena maasá Ánutuna tatúfirana suqá ámiranara níkóoqáandoora. Maasá maa aandaúsannoo tatúfirana suqárafa Isipa máqannaasa níkooqarana nímianaqa maasá qíqáfamaseeqa óonisamu maasá kuqá dárifoora. 27 Maasá qaaramoó fáasaana aadána máqa máaqaki óonuree aandáù tatúfirana Yáaweena maasá Ánutuna narí qímannimúndèe kái íqa suqá ámianaura.

28 Fáraoofa iriséenoo qinau. Dóo amaná ínnee aadána máqa máaqaí óonu máridaqa aandáù tatúfirana suqásee Yáaweena ínneeqa Ánutuna ámiaqa. Sía níanai fuaqa, adeedí máridaqa innaaru qídaqa qiníara faqa innaaru qiaqa.

29 Mooseefa Fáraoona úfa iriséenoo qímaminau. Aní máaqakiqari ráudeeqa qumuréeqa innaaru qianaura. Dúna kanánaana faufáari taikáannoo. Aní máaqaki fáqa aní aináiniranasaa rakísirausa máaqaki fáqa aní máqannaasa máaqáki faqa dúna kanánaana taikáannoo. Fáraoo sía kaifáa únna qímaseenana qáòo qia. Isaraee máqannaasa Yáaweena tatúfirana suqámiranara sía kafáa qáòo qia. 30 Miqí qímaseenoo Mooseefa Fáraoona máaqaki áiseenoo ráudamáfinoo Yáaweenara innaaru qinau. 31 Yáaweefa Mooseena irára ufa iriséenoo faufáari Fáraoona máaqakinaana faqa miná aináiniranasaa rakísi márusa máaqakinaana faqa miná máqannaasa máaqakinaana faqa aiqáma taikánnisanau. Sía moodáa fáufáari káqi márinau. 32 Miqí márufanoo Fáraoofa kafáa kaukaata qímaseenoo sía Isaraee máqannaasa idukúsoofaqa fiqau.